Wajibu na majukumu ya Tume ya Taifa ya Mipango ni kama ifuatavyo:-

1. Kutathmini hali ya rasilimali za taifa na kuishauri serikali kuhusu matumizi bora ya rasilimali hizo.
2. Kuandaa dira ya maendeleo ya taifa, mpango wa maendeleo wa muda mrefu, mpango wa maendeleo wa muda wa kati na mpango wa maendeleo wa muda mfupi, na kusimamia utekelezaji wake.
3. Kupendekeza maeneo ya miradi endelevu ya kielelezo na mikakati ya utekelezaji wa miradi hiyo kwa kuzingatia dira na mikakati ya maendeleo ya Taifa.
4. Kufanya tathmini na uchambuzi wa mara kwa mara wa viashiria muhimu vya uchumi ambavyo vinajumuisha urari wa malipo, mtiririko wa fedha na bei, deni la Taifa na kuishauri serikali ipasavyo.
5. Kutathmini sera mbalimbali zilizopo kwa lengo la kuimarisha utekelezaji wake kwa kuzingatia mipango ya maendeleo ya taifa na kupendekeza sera mpya pale inapoonekana inafaa kwa maslahi ya Taifa.
6. Kufuatilia utekelezaji wa maeneo muhimu ya vipaumbele vya Taifa kwa sekta mbalimbali za uchumi na kuhakikisha kuwa hatua stahiki zinachukuliwa ili kutatua changamoto zozote za uendeshaji zitakazobainika katika sekta hizo.
7. Kutoa mwongozo kuhusu ushirikiano wa kiuchumi kati ya jamhuri ya muungano na nchi nyingine na mashirika ya kimataifa.
8. Kuhakikisha mipango ya sekta inafungamanishwa na mipango ya taifa ili kuwa na matumizi yenye tija ya rasilimali za nchi.
9. Kufuatilia na kutathmini utekelezaji wa mipango ya kitaifa na miradi ya kielelezo na kuchukua hatua zinazohitajika ili kuhakikisha miradi hiyo inatekelezwa kwa ufanisi.
10. Kuishauri serikali kuhusu mabadiliko yoyote katika mpango wa maendeleo wa taifa ulioidhinishwa.
11. Kufuatilia utekelezaji wa maamuzi ya baraza la mawaziri kuhusu masuala ya mipango ya maendeleo na usimamizi wa Uchumi.
12. Kushauri kuhusu mikakati ya kuendeleza sayansi, teknolojia na ubunifu nchini;
13. Kukuza mbinu za ubunifu katika utekelezaji wa mipango ya maendeleo.
14. Kutambua na kufanya utafiti kuhusu suala lolote ambalo tume inaona ni muhimu katika kufikia malengo ya maendeleo ya taifa.
15. Kusimamia na kutoa mwongozo katika uandaaji wa mipango mkakati iliyoandaliwa na wizara, idara zinazojitegemea, wakala za serikali, sekretarieti za mikoa, mamlaka za serikali za mitaa na taasisi nyingine za umma.
16. Kuratibu na kuendeleza kada za mipango, uchumi na takwimu na taaluma nyingine zinazofanana na hizo.
17. Kuratibu makongamano ya wadau mbalimbali kwa ajili ya kujadili masuala ya mipango ya maendeleo.
18. Kubainisha rasilimali za nchi kwa matumizi endelevu kwa maendeleo ya taifa.
19. Kuwezesha ushiriki wa sekta binafsi katika upangaji na utekelezaji wa mipango ya maendeleo.
20. Kutekeleza majukumu mengine yanayohusiana na mipango ya maendeleo kadri Rais atakavyoelekeza.