Katibu Mtendaji wa Tume ya Taifa ya Mipango (NPC), Dkt. Fred Msemwa (kushoto), amekutana na Mkuu wa Huduma katika Ofisi ya Umoja wa Mataifa ya Ushirikiano (UN Office for Partnerships), Dkt. John Gilroy, kujadili mikakati ya kuimarisha uwajibikaji katika utoaji wa huduma za serikali za mitaa nchini Tanzania, hususan katika muktadha wa Malengo ya Maendeleo Endelevu (SDGs).

Mkutano huo umefanyika leo (22 Julai 2025) kandokando ya Jukwaa la Kisiasa la Ngazi ya Juu (HLPF) linaloendelea chini ya mwamvuli wa Baraza la Kiuchumi na Kijamii la Umoja wa Mataifa (ECOSOC), katika Makao Makuu ya Umoja wa Mataifa, New York.

Dkt. Gilroy amesisitiza kuwa kuimarisha uwajibikaji katika serikali za mitaa ni kipaumbele muhimu kwa ofisi hiyo ya Umoja wa Mataifa, na akaonesha utayari wa kuendeleza ushirikiano na Tanzania katika kukuza utawala bora na maendeleo jumuishi.

Dkt. Msemwa anaongoza ujumbe wa Tanzania katika HLPF ya mwaka 2025, ambapo nchi 36 zinawasilisha tathmini ya utekelezaji wa SDGs kupitia mchakato wa Tathmini ya Hiari ya Kitaifa (VNR).

Hivi karibuni, Tume ya Taifa ya Mipango ilizindua Dira ya Maendeleo ya Taifa 2050 (DIRA 2050), ambayo inalingana kwa karibu na Ajenda ya Maendeleo Endelevu ya 2030. Dira hiyo inajengwa juu ya nguzo kuu tatu zinazohusiana kwa karibu: uchumi imara, jumuishi na shindani; uwezo wa binadamu na maendeleo ya kijamii; na uendelevu wa mazingira pamoja na uthibiti wa mabadiliko ya tabianchi.

Nguzo ya mazingira inalenga kuiweka Tanzania kuwa kinara wa kimataifa katika uhifadhi wa mazingira, kwa kuhakikisha usimamizi endelevu wa rasilimali za asili na kuimarisha uthibiti wa athari za mabadiliko ya tabianchi kwa manufaa ya kizazi cha sasa na vijavyo.